Belokeko abadeburu 1972 eta 1987 artean, euskaltzain, IRATZEDERrek Euskal Herriko Elizari utzi dio egiazko altxor bat : Salmoen itzulpena, 1963an argitaratua « Salmoak » titulupean, bai eta ere orai gure elizetan emanak diren kantu gehienen hitzak.

Batikanoko II. kontzilioaren ondotik, Aita Xabier DIHARCE - IRATZEDER izan da, besteen artean, euskal liturgian kreatzaile langile suharra partikulazki Aita Gabriel LERCHUNDI eta Juan URTEAGA organistarekin.

Koralen batzordean partaide den laiko talde batek proposatu du Belokeko beneditanoeri Iratzederri omenaldi baten eskaintzea. Beneditanoek baietza eman dute orroitaraziz hunen lana ez zitaikela Urteaga eta Lerchundiren ganik berex.

Laster agertu da omenaldi hunek liturgia omenaldi bat izan behar zuela. Denek kartsuki kantatuz hiru idazle sortzaileek moldatu kantuak. Haueri esker baitu gaur Euskal populuak Jainkoa euskaraz otoizten eta goresten !

Lehen partean aratsaldeko lauetarik bostak artean, emanen dira liturgi urtean zehar kantatzen diren kantuak. Salmoak eta kantuak emanen dituzte parropietako abesbatzek : Garaziko San Frantses, Baigorriko Artzain Ona, Kanboko Lapurdiko San Mixel Garikoitz eta Donibane Lohizuneko Jondoni Petriko koralek. Organoan lagun izanen dituztela Etienne Rousseau-Plotto eta Thomas Ospital. Parte hartuko dute ere Baigorri eta Zuraideko gazte talde batek bai eta ere Donosti aldeko Oskarbi taldeak. Liburuxka elebidun bat izanen da bakotxak parte hartzeko gisan.

Omenaldi hori 17ak eta laurdenetan bururatuko da euskaraz kantatu Bezperekin.

Denak komit zirezte eliz omenaldi hortan parte hartzerat Belokeko elizan 2010ko Urtarrilaren 17an, aratsaldeko 4etan.